Pandan anviwon 2 zèd tan, revoke yo, ki te jwenn sipò plizyè lòt militan politik nan Tèt Kole Oganizasyon Popilè yo, ak nan komisyon Mobilizasyon Fanmi Lavalas,te chofe anpil, voye anpil pawòl piman bouk kont Rene Preval, gouvènè bank Santral la, Charles Castel, direktè Teleko a, Michel Presume, direktè CMEP la, Yves Bastien. Manifestan yo te avèk mayo yo ki make" 36 mwa pou revoke yo" Sitiyasyon sa a te fòse dirijan Teleko yo ak "Natcom yo ranvwaye seremoni pasasyon konpayi a, daprè revoke yo, ki se yonn nan patrimwàn peyi a. Sa k pi rèd la, laprès te deja rive sou plas ap tann seremoni an e pèsonn pa t vin pale ak jounalis yo, lè yo te wè sa yo te sètoblije al fè wout yo. Jiskaprezan, okenn moun pa okouran si seremooni sa a te rive fèt.

Fritz Gerald Charles, sekretè jeneral Platfòm anplwaye viktim entrepriz piblik yo (PEVEP) te deklare : « Nou vin la a jodi a, pou n ka defann dwa nou, jan mesye yo te revoke nou nan antrepriz piblik yo, sou pretèks y ap privatize bwat la, nan kad privatizasyon antrepriz piblik yo. E noumenm nou konnen revokasyon sa yo lye ak yon fwod, ak yon enfraksyon yo fè nan yon antrepriz. Donk si nèg yo leve kanpe yon bon maten, yo ba w yon lèt revokasyon, revokasyon sa a abitrè e ilegal. E kòm konsekans depi 3 lane n ap mobilize, pou egzije dirijan antrepriz yo peye n 36 mwa dedomajman ak kèk mezi dakonpayman.

Mentnan, sitin sa a, koresponn direktèman a pasasyon mesye yo te deside fè jodi a la, yo t ap pase Teleko a Natcom. Difètke yo te konnen n ap òganize yon sitin, donk yo ranvwaye pasasyon an, yo ranvwaye seremoni sa a. sa montre klè nèg yo konprann, yo rekonèt yo fè anpil manman ak papa pitit mal. Nou menm nou di, pliske gouvènman an debloke yon miyla 200 milyon goud pou fonksyonè Leta yo, e nou menm nou genyen 40 milyon goud nan bidjè 2009-2010 la, apati 30 septanm bidjè ap pran fen. Poukisa, menm gouvènman sa a pa ka debloke 40 milyon goud sa a konplete l pou peye revoke yo ? »

Depi kèk jou, tout moun k ap pase nan zòn Pon-Moren an ap konstate, anlè tèt Bildin Teleko a, yo make : « Natcom, S.A La vraie compagnie nationale de Télécommunications ». Direktè konsèy modènizasyon antrepriz piblik yo (CMEP) Yves Bastien, konfi me genyen dispozisyon k ap pran pou remèt konpayi Teleko a bay responsab Viettel yo sou Natcom. N ap raple w, sou premye manda Rene Preval la 1995-2000, li deja privatize 2 antrepriz Leta ayisyen te posede : Minotri ak Siman Dayiti. Sou dezyèm manda li a, li rive privatize pi gwo konpayi telekominikasyon peyi a te gneyen e l ap rapouswiv ak vann antrepriz Leta yo kouwè :otorite pòtyè nasyonal (APN), Ayewopò Pòtoprens lan, Elektrisite Dayiti (EDH) elatriye

Nan kad aplikasyon politik neyoliberal la, yo rele plan lanmò nan peyi Dayiti, se pa sèlman antrepriz piblik yo Rene Preval ak akolit li yo ap vann, nan mwan avril pase a, yo vann peyi a akredi bay gwo peyi enperyalis yo, ki genyen nan tèt yo Bill Clinton ak yon lwa dijans 18 mwa, sou pretèks peyi a bezwen rekonstwi aprè katastwòf 12 janvye pase a. Depi lè sa a okenn pwojè pa janm reyalize pou viktim 12 janvye yo, yo toujou kontinye ap viv anba moso dra sal, sou tout plas piblik yo, nan kapital la e yo toujou ap pwoteste kont movè sitiyasyon yo, menm jan ak viktim revokasyon ilegal e abitrè anplwaye antrepriz Leta yo : Teleko, ONA, SMCRS, APN elatriye.